Debido ás medidas preventivas de saúde pública como consecuencia da evolución do CORONAVIRUS e por indicacións da Consellería de Educación a Escola de Música Concello de Ortigueira permanecerá pechada dende o 16 de marzo (durante 14 días). Prevese retomar as clases o día 30 de marzo, confirmación que daremos no seu momento.

É por elo que tomamos as seguintes medidas:

– As clases do venres 13 de marzo son de asistencia optativa.

– Queda aprazada a Semana de Audicións para máis adiante. Nesas datas, previsiblemente, retomaríamos as clases coa programación habitual.

– Quedan aprazados os exames e entrega de notas da 2ª avaliación.

– Durante o tempo de corentena, a EMCO ofrecerá clases online e titorías o seu alumnado.

Como serán as Clases Online que ofreceremos?

A escola unha vez máis demostra ser un centro 3.0 no que ás TIC se refire. Durante o tempo de corentena faremos o seguinte:

LINGUAXE MUSICAL: O profesorado acudirá ó seu posto de traballo á vindeira semana. Durante os días 16 a 18 enviará pola plataforma TOKAPP e con copia por e-mail os exercicios teóricos da materia de Linguaxe Musical para imprimir, facer e reenviar cubertos ó profesor/a.

A través da canle de Youtube da EMCO poñeranse os vídeos explicativos teóricos e exercicios rítmicos ou de dictado musical para o acceso e práctica do alumnado.

INSTRUMENTO: No caso das materias de instrumento poderemos facer unha clase en directo vía Skype, sendo tecnicamente máis fácil o envío dun vídeo tocando o estudo/canción e sendo corrixida vía e-mail polo seu profesor/a. Cada departamento enviará a información oportuna de como se realizarán estas clases.

Son obrigatorias as clases online?

Non, porque o acceso a internet e o seu uso non o é. Con estas clases pretendemos dende as nosas posibilidades que poidades seguir estudando cun titor que corrixa os exercicios, e porque non… facer este tempo de corentena máis entretido para vós ca practica instrumental.

Calquera dúbida podedes enviala ó e-mail da EMCO.

Recibe un cordial saúdo,

Carlos Diéguez (Director EMCO)