Para celebrar un cuarto de século de historia, a Escola de Música Municipal de Ortigueira lanza “25 Anos de Música e Vida”, unha serie de vídeos conmemorativos onde compartiremos os fitos, proxectos, concertos e momentos máis destacados destes 25 anos de traxectoria.
Desde a súa creación no curso 2000-2001, a escola converteuse nun referente cultural e educativo no municipio, formando a xeracións de músicos e achegando a música a toda a comunidade. Neste curso 2024-2025, ao cumprir o noso 25º curso oficial, queremos facer unha retrospectiva visual e emotiva que recoñeza o traballo e a dedicación de todos os que fixeron posible esta gran aventura musical.
Durante todo o ano 2025, ofreceremos unha programación especial, con actividades, eventos e sorpresas para toda a veciñanza. Agardamos que esta serie de vídeos sexa unha homenaxe a todos os que formaron parte da nosa historia e un estímulo para continuar co noso compromiso de levar a música a cada recuncho de Ortigueira.